Роман Гиричев: «Мұғалім еңбегіндегі ең бағалысы – баланың бойынан білімге деген құштарлықты көру»
Дарынды балаларға арналған «ЛОРД» облыстық мамандандырылған мектеп-лицей-интернатының география пәнінің мұғалімі Роман Гиричев Солтүстік Қазақстан оқушыларына республикалық деңгейде жоғары нәтижелерге қол жеткізуге ғана емес, әлемді қызығушылықпен тануға да көмектесіп жүр, деп хабарлайды QZ NEWS тілшісі.
Дарынды балаларға арналған «ЛОРД» облыстық мамандандырылған мектеп-лицей-интернатының мұғалімі Роман Гиричев үшін география – жай ғана карта, атлас пен мемлекеттердің атауы емес. Бұл – балалардың ой-өрісін кеңейтуге, қоршаған әлемдегі өзара байланысты байқауға және жаңа дүниелерді қызығушылықпен ашуға үйретудің мүмкіндігі.
Роман Русланұлы 1996 жылдың 11 ақпанында Петропавл қаласында дүниеге келген. Ол кәсіби жолын ғылым және білім саласымен байланыстырып, М. Қозыбаев атындағы Солтүстік Қазақстан мемлекеттік университетінде іргелі білім алды. 2018 жылы бакалавриатты, ал 2020 жылы «География» мамандығы бойынша магистратураны тәмамдады.
Еңбек жолын жас маман СҚОФ «Қазгидрометте» инженер-гидролог болып бастады. Табиғи процестерді зерттеуге байланысты жинаған практикалық тәжірибесі кейінгі педагогикалық жұмысына жақсы негіз болды. 2022 жылы Роман Гиричев «ЛОРД» мектеп-лицейіне география пәнінің мұғалімі болып келді. Бүгінде ол талантты оқушылардың қабілетін ашуға өз үлесін қосып келеді.
«Мұғалім еңбегіндегі ең бағалысы – баланың пәнді түсіне бастаған сәтінде көзінің жанғанын көру. Оның сұрақ қойып, өздігінен жауап іздегені ерекше қуантады. Маңыздысы – білімді жай ғана беру емес, танымға деген қызығушылықты ояту, балаларды ойлануға, зерттеуге және алдына күрделі міндеттер қоюдан қорықпауға үйрету», – дейді ұстаз.
Оқушыларының нәтижесі де осы тәсілдің тиімділігін көрсетіп отыр. Шәкірттері жыл сайын география және жаратылыстану ғылымдары бойынша облыстық және республикалық олимпиадалардың жеңімпаздары мен жүлдегерлері атанады. Соңғы жетістіктерінің қатарында 2026 жылы Захар Шпанов пен Тимур Батенконың географиядан республикалық олимпиадада II дәрежелі диплом иеленуі бар. Тимур сонымен қатар республикалық жасөспірімдер олимпиадасында жүлдегер атанды. Педагог шәкірттерінің қоржынында «Қазақ білім олимпиадасы – 2025» байқауының III дәрежелі дипломы, «Аяулы менің Есілім» өлкетану пәні бойынша облыстық олимпиадасындағы жеңіс, сондай-ақ «Жоғары лига» облыстық олимпиадасындағы жүлделі орындар бар.
Бұл марапаттардың артында оқушылардың қабілетімен қатар, оларды зияткерлік сайыстарға дайындап, білімге деген ұмтылысын қолдап, алға қойған мақсаттарына жетуге үйрететін тәлімгердің күнделікті еңбегі тұр.
Роман Гиричев өзі де қол жеткізген жетістіктерімен тоқтап қалмайды. Ол республикалық және облыстық басылымдарда жарық көрген мақалалардың авторы. Сонымен қатар 5–11 сынып оқушыларына арналған география пәні бойынша элективті курстың авторлық бағдарламасын әзірледі. Кәсіби байқауларға да белсенді қатысады. 2025–2026 оқу жылында география пәні мұғалімдеріне арналған «Олимп шыңдарына» республикалық олимпиадасының күміс жүлдегері және мамандандырылған білім беру ұйымдарының жас педагогтарына арналған Teacher’s Hackathon хакатонының жүлдегері атанды.
Оның кәсіби қызығушылығы мектеп кабинетімен ғана шектелмейді. Педагог облыстық және республикалық семинарлар мен конференцияларда тұрақты түрде баяндама жасайды. 2023 жылы Үндістанда «Тұрақты даму және кәсіпкерлік» тақырыбы бойынша халықаралық офлайн оқудан өтті. Сонымен қатар Арктикадағы екі ғылыми-экологиялық экспедицияға қатысты. Мұндай тәжірибе оған оқушылармен тек оқулықтағы білімді ғана емес, зерттеу жұмысы барысында алған жеке әсерлерін де бөлісуге мүмкіндік береді.
Роман Гиричевтің қызметінде жас мамандарды қолдауға ерекше мән беріледі. Ол жаңа білім алуға, тәжірибе алмасуға және білім берудің заманауи тәсілдерін меңгеруге ұмтылған мұғалімдерді біріктіретін «Жас маман – жаңа қадам» Солтүстік Қазақстан облысының жас педагогтер қауымдастығын басқарады.
Педагогтің еңбегі 2025 жылы Солтүстік Қазақстан облысы әкімінің Алғыс хатымен, сондай-ақ «Дарын» республикалық ғылыми-практикалық орталығының, СҚО білім басқармасының, «Қызылжар дарыны» және Әдістемелік орталықтың көптеген Алғыс хаттары мен Құрмет грамоталарымен атап өтілді. Бүгінде Роман Гиричевтің педагог-модератор санаты бар.
Ұстаздар күні қарсаңында білім саласына жаңа идеяларымен үлес қосып, тәжірибе жасаудан қорықпайтын, өз үлгісімен өмір бойы білім алудың маңызын көрсететін осындай мамандардың еңбегін ерекше атап өткен жөн.
Роман Русланұлы үшін жетістік тек дипломдар мен грамоталармен өлшенбейді. Ол үшін шәкірттерінің қандай азамат болып қалыптасатыны, алға қойған мақсаттарына қаншалықты сенімді қадам басатыны және қоршаған әлемге қандай қызығушылықпен қарайтыны әлдеқайда маңызды.